Lillesorte på flyttefot!

Eg ser at bloggen min har fått ein del lesarar etterkvart. Det er veldig kjekt om nokon finn glede og inspirasjon i å lese om mine padleopplevingar :-)

Men frå no av vil det ikkje bli oppdateringar på denne bloggen. Lillesorte er nemlig på flyttefot! Eg har fått eige domene, og bloggen min vil heretter bli oppdatert på www.lillesorte.net. No i byrjinga vil det kanskje bli litt rot og ommøblering (slik det gjerne er rett etter ein flyttesjau), men eg håper og trur at flyttinga etterkvart vil gjere Lillesorte til ein betre blogg.

Eg håper dokke alle blir med på flyttelasset!



Delfinsafari

Dei siste dagane har ein gulflankedelfin halde til i fjorden ved Ulsteinvik. Vi valde difor å legge ut i kano og kajakk, og bruke laurdagskvelden til delfinsafari på fjorden. 


Vi speida etter delfinen ei god stund, utan at vi kunne sjå noko til den. Plutselig ropte Trygve at delfinen var ved kajakken hans! Eg trudde først at han tulla, men der var den altså, heilt inntil båten. 

Det er nærmast umulig å ta bilete av ein delfin, med mitt aldrande digitalkamera. Når kameraet endelig får tatt biletet, er delfinen vekk, og alt som er att, er ringane i vatnet. Eg valde difor å filme i staden. Kvaliteten er så som så, men her er filmen:




Vi fekk ein fantastisk kveld, som blei kruna med ein nydelig solnedgang!

"Det fins ikkje dårlig vêr...."

På ein tur for litt sidan, kom det på tale at vi skulle prøvd å fått til ein klubbtur med overnatting snart. Det er ikkje lett å få slikt til å passe for alle som vil vere med, men vi klarte å finne eit par dagar som sto ledige på kalenderen til dei ivrigaste av oss. Når tida nærma seg, såg det i følge yr og storm ikkje ut til at vi skulle få særlig klaff med vêret, men på tur skulle vi, uansett!


Mens vi pakka i kajakkane på Kjeldsund, plaska regnet ned, og når vi endelig var klare for å legge utpå, toppa det seg med lyn og buldrande tordenskrall. Vi lurte nok ein augneblink på om vi burde "snu i tide", men la i veg med friskt mot og klokketru på at vêret ville lette etterkvart. 


Og letta gjorde det!


Etter at Dragsundet var passert og vi hadde baugen retta mot Myrvågneset, skein det av og vart sommar!


Vi padla vidare innimellom holmane bortover mot Kristofferholmen, der vi tenkte å ta ei lita ilandstigning i det fine veret. Etter at alle ni i følget hadde kome seg på land, tok det til å regne igjen....


Like fort som sommaren kom, var han borte igjen, og skodda kom mot oss som ein grå vegg. Vi bestemte oss difor for å legge kursen direkte mot Kvitøya, der vi skulle slå leir for natta. 


Ved ilandstigninga på Kvitøya, hadde den tjukkaste skodda letta.


Trollsk  :-)


Kvelden heldt fram i same stil, med veksling mellom godvêr og høljeregn. Det la likevel ingen dempar på stemninga, og vi kosa oss med god mat og godt selskap.

Med tørr, medbrakt ved, blei det skikkelig leirbål også!

Etter at ungane hadde teke kvelden, kosa vi vaksne oss ved bålet til langt uti dei små timar....


Etter ei god natt med tromming på teltduken, vakna vi til ein strålande dag!


Vi laga god frukost, før vi pakka i båtane og la utpå igjen.


Yes! Ein båt! 


Trygve syns det var skikkelig kult å padle på hekkbølgene til dei få båtane som passerte. 


Å padle tett inntil land er super teknikktrening...., og veldig gøy!


Pausa tok vi på Veøya.


Undervegs i dag ropte Trygve til meg: 
"Mamma! Velt, da!" 
"Nei, ikkje no" svarte eg...
"Det er viktig å trene på det!" ropte han tilbake :-)
Trygve er ikkje redd for å trene! På slutten av turen hadde han ei god økt.... 


.....med hopp frå kajakken


.....og klatring oppi igjen :-)

Dette var første overnattingsturen vi har vore med på i klubbregi, men det blir ikkje den siste! Til tross for vekslande vêrtilhøve har vi kosa oss veldig. Det treng ikkje vere godvêr når ein er kledd for å tåle vatn, og det er vi sjølvsagt når vi padler kajakk. 

Med på turen var gemalen og eg med våre tre barn. I tillegg var Eldar, Jan, Elin og Hege med.


Lunsj på eit svaberg...

Det blei ein kort tur i dag, men det er ikkje alltid distansen det kjem an på. Då eg las meldinga frå Elin om tur i dag, var oppmøtetidspunktet rett om hjørnet. Det er ikkje gjort på eit blunk å klargjere kajakker og utstyr når ein skal ha barn med på tur, så vi avtalte at Elin, Eldar og Christer berre skulle dra, og at vi skulle slå oss i lag med dei undervegs. 


Då vi endelig var klare, ringde vi dei og avtalte kvar vi kunne møtast. Dei hadde alt padla ei god stund, og var klare for pause. Vi padla derfor bort til ein holme og tok lunsjpausa med ein gong. Trygve syns dette var ein god plan. Han syns absolutt at pausene er eit høgdepunkt under turen. 


Trygve har fått ny håv, og jakta på maneter og kråkeboller frå strandkanten.



Godt med kjeks...


Kaffi på kok...


Baristakunst i sjøkanten. Trygve er ivrig lærling. 

Kveldstur til Holesanden

Denne veka har vi svogeren min og dei to borna hans på 9 og 10 år på besøk. I kveld tok vi dei med oss til Holesanden, slik at dei kunne få prøve kajakk og kano. Også våre tre born var med. Ungane var kledde i tørr- eller våtdrakter, så det gjorde ingen ting at det regna litt. 



I kveld fekk vi også testa den nye kajakken vi nylig kjøpte til Trygve. Dette har eg gledd meg til! Kajakken ser veldig flott ut, og det var spennande om den også innfridde på vatnet. Og det gjorde den! Den glir fantastisk i vatnet, og er veldig retningsstabil for sin lengde på berre 370 cm. Med skegget nede går den rett som ei snor. I tillegg responderer den fantastisk på kanting, og er fin og stødig med ganske flat V-botn. Dessuten er størrelsen perfekt!

 Åra som fulgte med blei også ein positiv opplevelse. Det er ei grønnlandsåre med smale blad. Blada er flate på eine sida, og har ein "rygg" på andre sida. Åra er litt boga, slik at blada bøyer litt framover mot baugen. Den var veldig god å padle med, og er lett og fin for ein guttfante på knapt åtte år. 


Glad gut i ny, flott skute!


Vi hadde nokre kjekke timar med både bading, padling og grilling.


Jenni prøver Cowboy-entring :-)


Jonas fekk raskt taket på padlinga og padla det meste av kvelden. Først i Scouten, deretter i nyebåten til Trygve og til slutt i greenlanden min. 


Gemalen ville også prøve det nye vidunderet....


....og mor sjøl kunne ikkje vere dårligare :-)

Aktivitetsleiarkurs på Varholmen

Denne helga har eg vore på aktivitetsleiarkurs på Varholmen. Det har vore ei helg med mykje bading, mykje tauing og enormt mykje læring! 



Aktivitetsleiarkurset skil seg ganske mykje frå dei tidlegare kursa eg har teke i våttkortstigen. Vi fekk absolutt ikkje presentert ei ferdig "oppskrift" på kva vi skal gjere i ulike situasjonar. Derimot gjorde vegleiar og assistenten sitt beste for å sette oss i vanskelige situasjonar, som vi sjølve måtte finne ei løysing på. Det har vore mykje krøll og tull med taueliner, utallige velt, og kjølstripa mi har virkelig fått kjørt seg i nærkontakt med rur og berg. Meir enn ein gong har eg følt det som at eg har virra rundt som ein hovudlaus kylling.  

Likevel har dette vore eit utrulig artig kurs! Eg har lært veldig mykje, og ikkje minst har eg fått opp augene for kva det inneber å ha ansvaret for ei gruppe under ulike forhold. 

Det har vore mykje pes, men litt tøys og moro har det også blitt tid til! 


Har du nokon gong tenkt over kva det inneber å padle ein kajakk utan framskott, dersom cocpit blir fyllt med vatn? Eg har tenkt på dette, og i helga fekk eg testa det. Vi fyllte cocpit og luka framme med vatn, og resultatet ser du ovanfor. Kva som kunne skjedd dersom kajakken heller ikkje hadde hatt eit tett skott bak, kan du sikkert førestille deg. Det er med andre ord ikkje kva som helst slags kajakk du bør legge til havs med. 


Ei av oppgåvene vi fekk under kurset, var å lage eit kort opplegg for deltakarane på teknikkurset, som også gjekk føre seg på Varholmen i helga. Det var oppvarming, ei teknikkøkt og til slutt litt leik og moro, med leikar som utfordra balansen. Her er det Are som gjer eit hederlig forsøk på å rulle kajakken 360 grader rundt, under seg, utan sjølv å havne i sjøen. Det var ikkje ei enkel oppgåve, men innsatsen var det ingenting å utsetje på!

No er eg altså Aktivitetsleiar Hav, og kan halde intro- og grunnkurs i Våttkortstigen. Før det blir aktuellt, har eg lyst å bli med som observatør eller assistent på nokre kurs med flinke og erfarne vegleiarar. Eg har lært mykje denne helga, men har utvilsom meir å lære! 




Ny skute til yngstemann :-)

Guten vår har hatt eigen kajakk ei stund, etter at vi kjøpte ein Perception Scout til han i fjor sommar.  Scout'en har vore grei nok, men etterkvart som interessa har vokst, og Trygve har blitt med på litt "skikkelige" turer, har vi sett behovet for at han også skulle få ein "skikkelig" kajakk. 

Gode kajakkar til barn veks ikkje på tre, så vi har brukt mange timer på nettet på leit etter den rette. For ca. ei veke sidan kom eg over ei annonse på finn, som fanga interessa mi!



Kajakken er designa og produsert i Nederland, men det var ikkje mulig å finne informasjon om den på internett. Etter å ha hatt kontakt med selger på mail og telefon, og fått litt fleire bilete, bestemte vi oss for at vi ville ta sjansen på å kjøpe den. Det har vore nokre spennande dager fram til vi kunne hente kajakken på Ørstaterminalen i dag. 


Det var litt julekveld i Ørstaterminalen, når vi pakka ut nyebåten.


Stolt reder i ny båt! Det var veldig kjekt å pakke ut og sjå at båten såg like fin ut som vi håpte på :-)  No er vi spent på korleis den er på sjøen. Dette blir spennande!



Våt kveldstur

Etter turen på tysdag, der gutane til Elin fekk prøve kajakk for første gong, ante det meg at det ikkje ville bli siste turen deira. Det fekk eg rett i! I dag vart det nemlig tur igjen. Også i kveld la vi turen til Eggesbønesstraumen, sidan vi der har lett tilgong på klubben sine kajakkar. 

Det regna ganske tett innimellom, men det såg ikkje ut til å leggje nokon dempar på stemninga.


Gøy å padle seg fast i tangen. Kjem vi oss lause igjen, skal tru?

Pause måtte vi også ha.


Trygve trenar svingteknikk. Han begynner å bli ganske flink!  :-)


Sjølv om Straumen ikkje er store området, klarte vi å vere på tur i nesten 4 timar. Vi padla også ein tur under brua, bortover mot Flusund. 


Eit naust som nok har sett sine beste dager....


Tauelinene kom godt med i dag også, men ungane blir stadig flinkare til å padle. I morgon skal vi hente ny kajakk til Trygve. Den blir spennande å få prøve :-)

Straumen

Sidan vi hadde ein så flott tur i går, frista det veldig å padle i dag også. Dessutan har vi ferie, og då kunne vi ikkje finne nokon god grunn til å la vere. Elin hadde med seg gutane sine, Daniel og Elias, på padletur i dag. Dei har aldri padla kajakk før, så dei var ganske spente, både gutane og mora.


Tor Inge blei også med på tur i dag. Vi la ut frå småbåthavna rett nedanfor huset hans, for å ta ein padletur i Straumen. 


Elias var raskt på vatnet, og fann seg straks tilrette i kajakken. Ikkje lenge etter var også Daniel på plass.


Straumen er ein veldig grei plass å prøve seg i kajakk for første gong. Der er skjerma for ver og vind, og ein er aldri langt frå land. 

Trygve har vore med ein del gonger no, og har etterkvart forstått at vi har litt sansen for å padle på "uframkomelege" stadar. Vi hadde egentlig ikkje tenkt oss gjennom denne vegen, men når Trygve annonserte at der var eit hol i gjerdet, måtte sjølvsagt Eldar teste om det gjekk an å kome gjennom. 


Trygve padla like etter i fin "limbo-stil".


Pause måtte vi også ha, og vi kosa oss med mykje god niste. 

På ein av holmane i Straumen ligg eit gamalt falleferdig hus. Det ser nesten ut som eit spøkelseshus


Trygve og Elias er ikkje spor redd for spøkelser, så dei gjekk i land for å undersøkje litt. 


Når dei to gutane skulle ombord i kajakkane igjen, tok Elias sin kajakk overbalanse  så han datt i sjøen. Det tok han med knusande ro. Trygve tok jobben med å tøme kajakken mens Elias fekk av seg litt våte klede. 


Etter at Elias var komen i kajakken igjen, la vi kursen tilbake til utgangspunktet. Dei tre gutane fekk litt drahjelp frå kvar si slepeline. Trass i våte klede og litt trøtte armer, var det ingen sure miner. Det er nok ikkje siste gongen desse blir med på kajakktur.   

Ein veldig kort langtur

I dag hadde vi planer om å padle ut frå Osnessanden, men når vi kom dit ned bles det såpass mykje at vi bestemte oss for å padle frå Blikkvågen i staden. Det bles i Blikkvågen også, men ikkje meir enn vi kunne tåle.

Med på turen i dag var Eldar, Elin, Trygve og eg.


Med ein 7-åring på slep kan vi ikkje legge opp til nokon langtur. Vi padla til Dimna sørpynt og kryssa Røyrasundet bort til holmane på andre sida.

På ein av holmane der, gjekk vi i land til det som skulle bli ei laaang og god pause. (Legg merke til vannstanden på bildet når vi gjekk i land....)

I pausa kosa vi oss med mykje god mat og prat.


Måsen fekk også ta del i etargildet.


Sjølv om tida og timane gjekk, var det ikkje antydning til mas om å ville heim. Trygve kosa seg og leita etter skjell og kråkeboller.


Ingen veit sikkert kor lang pausa var, men når vi endelig pakka i båtane igjen var det snart flo sjø.

Sjølv om Trygve er veldig flink å padle sjølv innimellom, var tauelina god å ha også i dag. Eg for min del har ikkje vondt av litt tauetrening før aktivitetsleiarkurset neste helg, så egentlig er det ein vinn-vinn-situasjon ;-)


På returen til Blikkvågen valde vi å padle gjennom sundet mellom Flatøya og Skreddarholmen. Eldar hadde seg ein prat med dei "fastbuande" på Skreddarholmen, før vi padla bort til nokon som hadde slått opp eit telt litt lenger borte på holmen.

Dette viste seg å vere ein kjenning av Eldar, som var på telttur i lag med dottera si. Då vi blei inviterte i land på ostesmørbrød, tok vi likegodt pause nummer to for turen.


Når vi endelig retta baugen mot Blikkvågen igjen var det blitt seint på kveld. Då hadde vi padla ca. 6,5 kilometer og vore på tur i nesten 11 timer! 
Vi har med andre ord kosa oss meir enn vi har padla i dag :-)


Les mer i arkivet » Juli 2010 » Juni 2010 » Mai 2010
hits